هل هلالك

و أخيرا جه رمضان.. جه بكل الأفراح والذكريات بتاعة كل سنة..من أول المسحراتي والصحيان قبل الفجر عشان السحور, وصلاة الخمس صلوات في المسجد, ولعب الكورة قبل الفطار, والعزومات, وتاخد سجادة الصلاة معاك في التراويح عشان الامام صوته ما فيش زيه وما فيش أماكن,  و و و حاجات تانية كتيير.

 

طبعا كلنا بنحب رمضان. بس ده ما يمنعش ان احنا ننتقد بعض المظاهر اللي بترتبط بيه؛ وده زي الصواريخ, والصواريخ اللي قبل الفطار (الصواريخ هنا تعبير مجازي يدل على العربيات)...

 

أولا بالنسبة للصواريخ؛ ممكن الخص رأيي بالنسبة ليه في كلمتين: "تخلف حضاري"...ولا مؤاخذة. بس هو فعلا تخلف حضاري. هل ممكن تتخيل انك تجيب ربع جنيه وتقوم مولع فيه؟!!!!  ايه التخلف ده؟!!!! اهو ده بالضبط اللى أنا قصدي عليه, لأ وياريت انك بتولع الربع جنيه لوحده, دا انت كمان بتعمل صوت مفزع ومزعج جدا لأي واحد عنده ودان. من ناحية تانية؛ ايه المتعة اللي بيحس بيها الأطفال لما يفرقعوا صاروخ؟!!!! دايما باسأل السؤال ده لنفسي ومش لاقي اجابة لحد دلوقتي. عجبيني فكرة سمعت عنها قبل كده وهو ان واحد بنى بيت من الرمل وحط صواريخ في أماكن معينة منه وبعدين حط عليه بنزين, و عيش بأه. هو ازعاج صحيح, بس على الأقل فيه شوية تفكير.

أنا رأيي أن دي مسئولية مشتركة بتبتدي بالتربية في البيت اللي مفروض تعلم الأبناء ثقافة احترام الآخرين وتعليمهم قيمة الهدوء في المجتمع, اذا ما نفعتش التربية المفروض الدولة تمنع استيراد الصواريخ, اذا ما نفعش لا ده ولا ده المفروض البياعين يكون عندهم شوية احساس بانتماء وشوية احساس وما يبيعوهاش, وللا هما ما عندهمش ودان؟!!.  (ملحوظة: خرم وداني وانا باكتب الموضوع كام صاروخ)

 

ثانيا العربيات؛ بكل اختصار بيقوللك: سوق برراحة عشان توصل بسرعة. فعلا؛ الناس قبل الفطار بتسوق وسط الشوارع الضيقة بدون مراعاة ولا لتقاطعات ولا اشارات ولا أي قواعد مرور, فاذا افترضنا ان ولا ده راعى ولا اللى طالع من تقاطع راعى, هيحصل ايه؟!!!  وكمان الفطار مش هيطير, وللا هو حرص على وصية سيدنا محمد -صلى الله عليه وسلم- على التعجيل بالفطار؟!!! يا أخي ما هو برضه وصى بالحفاظ على الحياة.

 

وكمان فيه حاجة ما بحبهاش هو انك تلاقى المساجد في رمضان ما شاء الله الله أكبر والصدقات ما فيش أكتر منها واليتامي و و و, بس بعده!!!!!!!!!!!!!!!!!!!!!!  مش عارف ليه..وللا يعني عشان الثواب بيبقى مضاعف في رمضان؟!!! عموما متهيألي ان ثواب الثبات بعد رمضان (ولو على الحد الأدنى) ليه ثواب أكبر وأكبر. عبادة شهر واحد وللا 12؟!!! احسبوها.